E plotësuar: Ka vdekur edhe vajza tjetër, e aksidentit tragjik në Drenas, ku një tren goditi dy vajza të mitura. Informacionin e ka bërë të ditur për lajmi.net, zëdhënësi i policisë rajonale të Prishtinës, Agron Borovci. 


Ai ka thënë se posa janë informuar nga Qendra e Mjekësisë Familjare në Drenas, se ka vdekur edhe vajza tjetër. Bëhet fjalë për dy vajza të mitura, njëra e moshës rreth 11 vjeçe dhe tjetra rreth 13.

Pjesëtari i FSK-së, Naim Hakiqi, i vetëvrarë dje, është varrosur sot me nderime të larta ushtarake në fshatin Llapashticë të Podujevës.

Ai kishte bërë vetëvrasje me armë zjarri në shtëpinë e tij në fshatin Llapashticë. Isak Ejupi, komandant i Policisë në Podujevë, ka bërë të ditur se i ndjeri Naim Hakiqi, i lindur më 1988, kishte bërë vetëvrasje rreth orës 12.00.

Në varrimin e të ndjerit ka marrë pjesë edhe komandanti i FSK-së, gjeneral Kadri Kastrati, oficer dhe ushtarë të FSK-së. Në mesin e të pranishmeve ishte edhe deputeti, Latif Gashi, transmeton indeksonline.

Të dhënat e publikuara në faqen zyrtare të Agjencisë së Inteligjencës Amerikane thuhet se Maqedonia nuk ka problem të tjera të hapura përveç refuzimit të Greqisë për pranimin e emrit të vendit.


“Kosova dhe Maqedonia e kanë përfunduar demarkacionin e kufirit të ty re në shtator 2008; Greqia vazhdon të refuzojë pranimin e emrit Maqedoni ose Republika e Maqedonisë”, thuhet në librin e fakteve të publikuar nga CIA, shkruan e përditshmja “Koha” në Maqedoni.

Ndërkaq sipas të dhënave të publikuara nga CIA, nuk është regjistruar asnjë problem dypalësh për Shqipërinë dhe Bullgarinë.

Ndërsa për Serbinë është theksuar problemi me Kosovën dhe pjesët kontestuese të kufirit me Bosnjë dhe Hercegovinën përgjatë lumit Drina.  

/reporteri.net/

Një përleshje mes të rinjsh ka sjellë deri tek therja me thikë të dy prej tyre në lagjen ‘Santea’ në Prishtinë.

Këtë për KosovaPress, e ka konfirmuar edhe zëdhënësi i Policisë, Agron Borovci, i cili ka treguar se ngjarja ka ndodhur rreth orës 22:00.

“Rreth orës 22:00 ka ndodhë te Santea, dmth në lagjen Dardania. 2 persona kane marre lëndime nga therja me thikë”, ka thënë Borovci.

Më tutje, ai ka bërë të ditur se personat janë dërguar për trajtim mjekësorë në Qendrën Klinike Universitare të Kosovës, ndërsa Policia po qëndron në vendin e ngjarjes dhe po punon për hetimin e rrethanave të ngjarjes.

/reporteri.net/

Profesori i Medresesë “Alaudin” në Prishtinë, Xhabir Hamiti, është i bindur se nuk konsiderohet luftë kundër islamit dhe as kundër myslimanëve që të mos pajtohesh me përfaqësuesit e një orientimi devijant ideologjik dhe sektar, i cili së pari është i dëmshëm për vetveten e tyre dhe kërcënues për të gjithë të tjerët të cilët nuk mendojnë dhe besojnë si ta.

Hamiti në një artikull të botuar në profilin e tij në Facebook, ka kujtuar se si ishte përjashtuar nga kryesia e BIK-ut, të cilëve thotë se i kishte paralajmëruar se duhet qenë vigjilentë. Për këtë madje, kujton ai, ishin sulmuar edhe fizikisht.

Ai, thotë se pyetja e tyre e hershme, e që ja vlen të përsëritet edhe sot është se: A mund të jemi e të qëndrojmë shqiptarë dhe pjesëtarë të besimit Islam, pa qenë pjesë e asnjë lëvizje të huaj ideologjike fetare dhe politike, me fjalë të tjera të jemi autokton në mendimin dhe kultivimin tonë fetar?

Me pohim të plotë mund të themi se: MUNDEMI!

“Si njohës të mësimeve islame, të lëvizjeve politiko fetare, të traditave zakoneve dhe fanatizmave të pjesës së botës islame, që herët patëm paralajmëruar se duhet të jemi vigjilent si popull dhe të bëjmë dallimin mes tyre dhe fesë në gjenezë, si dhe devijimeve që popujt e ndryshëm i bënë dhe po i bëjnë nën ombrellën e saj, në rrethana krejt tjera nga hapësira e jonë, për të realizuar qëllimet e tyre grupore, sektare dhe gjeopolitike”, thotë Hamiti, teksa shton se me këtë asnjëherë nuk është synuar që të ndodhë kjo që ndodhi e cila, siç thotë ai, i erdhi vendit tonë bumerang, e që fatkeqësisht shoqërisë kosovare i dha dhe po i jep një imazh tepër të keq, karshi vendeve mike të botes perëndimore dhe islame.


“Neve, në vend që ta na dëgjojnë e ta analizojnë atë që e thoshim, pikërisht ky lidership i BIK-ut e bëri të kundërtën, ngriti aktakuzë të brendshme ndaj nesh dhe na largoi me dhunë nga pozitat e brendshme që kishim, duke zhvilluar edhe propagandë në mesin e xhematit të rëndomtë, se gjoja ne jemi kundër Islamit dhe BIK-ut, ndërsa vetën e shihnin dhe e paraqisnin kinse shpëtues të tij, gjersa sot e kanë mbushur gojën plotë me thënien tonë të hershme, se për neve “Islami tradicional” është rruga e cila duhet ndjekur”, thotë ai. “Megjithatë, është shumë mirë që e kanë kuptuar më në fund!”.

Hamiti, thotë se për të përkujtuar, atyre u pati ndodhur edhe më e keqja, sa që, për që ishin kërkuar, kërcënuar dhe madje sulmuar fizikisht nga grupe kriminale, të frymëzuara nga ata që, siç thotë Hamiti “neve, na shihnin rrezik për ta. Pse!”.

“Sot është tepër e dhimbshme për ne si dhe për familjaret e tyre në rend të parë kjo që shohim sot me këta të rinj, të cilët kanë rënë pre e propagandës nxitëse anti parimeve fetare, humane dhe kombëtare tona, për çka besojmë se më vonë edhe ata vet do ta kuptojnë se kanë qenë të manipuluar nga tutorë të paguar për te rënë në grackë, nën emocionet e ndjenjave fetare”, thotë Hamiti.

Njohësi i çështjeve islame, dhe pretendenti për myfti në BIK, thotë se kësaj në fakt nuk duhet dhe nuk do të duhej t'i gëzohet askush.

“Nuk konsiderohet luftë kundër islamit dhe as kundër myslimanëve që të mos pajtohesh me përfaqësuesit e një orientimi devijant ideologjik dhe sektar, i cili se pari është i dëmshëm për vetveten e tyre dhe kërcënues për te gjithë te tjerët te cilët nuk mendojnë dhe besojnë si ta”, thotë Hamiti, teksa shtron pyetjen e hershme, e që thotë se ja vlen ta përsërisë edhe sot se a mund të jemi e të qëndrojmë shqiptarë dhe pjesëtarë të besimit Islam, pa qenë pjesë e asnjë lëvizje të huaj ideologjike fetare dhe politike, me fjalë të tjera të jemi autokton në mendimin dhe kultivimin tonë fetar?

“Me pohim te plote mund të themi se: MUNDEMI!”, përgjigjet ai.


Në fund, Hamiti fton të gjitha institucionet vendit, liderët politikë, shoqërinë civile që gjendjen e krijuar të mos e përdorin për poena dhe interesa te tyre, por që problemin ta shohin të përbashkët, sepse qetësia, stabiliteti dhe zhvillimi i vendit në binar të drejtë është në interes të të gjithëve.

Ai jep një zgjidhje se si të dilet nga kjo situatë.

“E dimë që është e vështirë dhe e dhimbshme që ky lidershp i BIK-së te pranojë dorëheqjen, mirëpo realitetit të krijuar sot, me dhe pa fajin e tyre nuk mund t'i iket. Për hir të institucionit të vet BIK-së në rend të parë, pastaj të shoqërisë dhe vendit propozojmë që t'i lënë anash inatet personale dhe të ulemi me koka të ftohura, duke krijuar një udhëheqje gjithëpërfshirëse teknike, e cila do të marr për obligim reformimin organizativ dhe administrativ të këtij institucioni deri në zgjedhjet e reja të nivelit lokal dhe qendror, sepse kjo udhëheqje e sotme e ka humbur kredibilitetin e saj dhe është e pa denjë për të bërë ndryshime serioze. Ky do ishte hapi parë dhe imediat i cili duhet bëhet, kurse hapi i dytë është që shpejt dhe në bashkëpunim me institucionet e vendit, të rregullohet pozita juridike e BIK-së në mënyrë që pa vonesë të ecet përpara me agjendë të qartë dhe transparencë të plotë”, ka thënë Hamiti.

Se zgjedhjet e më hershme në këtë institucion kanë qenë fatkeqësisht skajshmërisht të manipuluara, sot askush nuk e vënë më në dyshim, sado që dikush nga brenda po mundohet në formë talalli t'i paraqesë ato të rregullta dhe transparente, thotë Hamiti.

“Jemi apo nuk jemi ne protagonistë të këtij ndryshimi nuk është aq e rëndësishme, por e rëndësishme është që kjo urgjentisht të ndodhë, jo për qejfin dhe dëshirën e askujt, por për nevojën e domosdoshme të BIK-së dhe shoqërisë tonë në përgjithësi. Gabimet duhet t'i pranojmë me qellim që ato t'i përmirësojmë. Askush nuk është i pa gabueshëm dhe i përkryer.

Me këtë nuk kërkohet diskriminimi i askujt, por vetëm punë dhe angazhim aktiv, kritere, përgjegjësi dhe transparencë për te gjithë pa dallim!”, ka thënë ai.

Komisioni Ndërkombëtar për Persona të Zhdukur, ka bërë identifikimin edhe të 16 personave, viktima të luftës së viteve 1998 -'99, në Kosovë. Komisioni Qeveritar i Republikës së Kosovës për Persona të Zhdukur, është njoftuar përmes Kryesueses së Grupit Punues për Persona të Zhdukur, nga Komisioni Qeveritar i Serbisë, mbi identifikimin edhe të 16 personave, nga mbetjet mortore të zhvarrosura nga varreza masive në Rudnicë, të Rashkës. 


Kushtrim Gara, Udhëheqës i Njësisë së Komisionit Qeveritar për Persona të Zhdukur, ka bërë të ditur për Reporteri.net, se priten edhe identifikime të reja në ditët dhe javët në vijim, gjithnjë duke pasur parasysh numrin e mostrave të mbetjeve mortore, të zhvarrosura nga lokacioni i varrezës masive në Rudnicë, të Rashkës, e të dërguar për analizë të ADN-së, në fund të muajit qershor, të këtij viti. 


Sipas Kushtrim Garës, përmes ”Sektorit për Komunikim me Familjarë në kuadër të Departamentit të Mjekësisë Ligjore, fillimisht do të njoftohen familjet përkatëse të personave të zhdukur, të identifikuar, gjithnjë në respektim të procedurave ligjore dhe të drejtave të familjarëve për të ditur për fatin dhe vendndodhjen e më të dashurve të tyre, të zhdukur gjatë luftës. Dhe varësisht nga kërkesa dhe vendimet e tyre do të procedohet tutje, në kuptimin e caktimit të datës për fillimin e procedurave  të riatdhesimit të mbetjeve mortore të personave të identifikuar”. (reporteri.net)